• Knoppele Slideshow Aside Kerstmis
  • Muziek Aside 960x1080
  • Knoppele Slideshow Aside Winter

Biografie Patronaatsknöppele

De veer Patronaatsknöppele ljèrde zich kènne via de Aelser Revu, wo zie eeder afzônderlik verschillende rolle sjpeelde. Rondj 1990, sjpeelde 3 (Jos, Pierre en Peter) van de 4 Patronaatsknöppele in dezelfde scène in de Revu, en dat klikde zwa good, dat ze besjlaote auch de jaore daonao, same scènes te gaon sjrieve en sjpeele in de Aelser revu. Ein jaor of tjwè later kaom auch nummer 4 (Jan) debiej, en ein echte vriendeklup waor gebaore.

Nao ein galazitting van Carnavalsvereiniging De Sajelaire, ging de klup van 4 nao ‘t hoes van de sjûs oetgeroope Prins Frank (Snellings) de Jètste, om nog ein pilske te pakke. (Pierre es oud-prins wis dat de prins dat hjèl erg op pries sjtèlt es hae midde-in-de-nach en totaal-los thoes kump) Ongerwaeg woort sjpontaan ein leedje gemaak mit de teks; veer riete dae Frank eine biej. En toen ze biej ‘t hoes van Frank aankaome zônge waal 30 luuj mit hun mit. Hiedoor waor ‘t idee gebaore ein vastelaovesleedje te make, ze hauwe ein aantal luuj die ein teks kooste sjrieve en ze hauwe auch eine hjèle gooje zènger (Jan) in hun midde. Ein teks hauwe ze, mèh ze moste nog eemes höbbe dae de meziek veur hun koos make, en dae vônge ze in de persoon van Jürgen Daemen.

Ein tekst hauwe ze, eine componist mit ein melodie hauwe ze auch, eine zènger hauwe ze en auch ein achtergrôndjkwar. ‘T einigste wat ze nog neet hauwe waor eine naam. Jos woort al jaore door ziene chef op zien werk Patronaatsknöppel of zaotbökkem geneumd es hae weer ins ein sjtômmigheid hauw oetgehaold. En omdat de veer jônges zich door sjtômmigheid gevônje hauwe, woort besjlaote de naam Patronaatsknöppele te gebruuke. Dus veur eederein dae zich aafvreug wat de naam Patronaatsknöppel betaekend, hiej ‘t èndwoord, Patronaatsknöppel is sjtômmerik.

Patro woordlogo

Es veer de Aelser Diksjenaer "De Platte Aelsenaer" (gesjreeve door Jo Cobben en oetgave door Stichting Streekmuseum Schippersbeurs) drop naolaeze sjtei biej ‘t woord patronaat; ‘n geboew wo ‘t vereinigingslaeve ein ôngerdaak haet veur ‘t hauwe van vergaderinge, of biejeinkômste van andere aard.

‘T woord knöppel kump in ‘t gans woordebook neet veur, omdat in Aelse volgens de diksjenaer dat woord es klöppel weurt oetgesjpraoke. Biej de volgende oetgaaf van de diksjenaer zal ‘t woord Patronaatsknöppel waal drin sjtaon, en biej de besjrieving kènne ze dan zètte; veer jônges oet Aelse mit ‘t vastelaoveshart op de gooi plaats, die väöl kwatsj, meziek, sjpas en plezeer gemaak höbbe.

Mèh noe effe trûk: tekst, meziek eine naam ein kostuum, alles waor kompleet, en de premiere vông plaats op de èlefde van de èlefde 1995. ‘T succes waor giganties. Zwa grwaot, dat zelfs ein fenklup woort opgerich, door Leonie, Marjon, Jeanne en Rie, die vanaaf dat moment de knöppele euveral volgde en hôlpe biej alle werkzaamheden die zich veurdeege. Auch woort René Snellings bereid gevônje om de knöppele mit raod en daad biej te sjtaon, want ôm zake te reigele waore de knöppele zelf väöl te sjtôm. René is tot op de daag van vandaag nog altied de graote sjteun en toeverlaot.

Euveral in Aelse woorte zie gevraog veur ein optrèje. Die optrèjes doerde waal altied mèr effekes, want ze hauwe mèr éin leedje. Dus woort’r ein tradisie van gemaak ôm eeder jaor ein nuuj leedje te sjrieve.

Mèh auch dit waor veur de Knöppele neet genôg, en in 1999 volgde de jètste CD mit 9 eige nummers, van meziek veurzeen door Jürgen. De CD mit de titel “Lache is gezondj” die in ein oplage van 500 sjtöks mit geljènd geld wòrt gemaak, waor nao 3 waeke volledig oetverkoch. De fenklup waor inmiddels oetgegreujd tot 100 leeje en de optrèjes boete Aelse woorte auch ûmmer suuksesvoller, en de knöppele wilde wier de provincie in.

Via Nico Theunisz (jewaal de broor van Frans Theunisz) kaome de Knöppele biej studio Pebble Music in Mestreech terrech, wo ze de jètste kjèr ein bitje argwanend woorte aangekeke ( wat môtte die boere oet Aelse noe hei in Mestreech in de studio). Mèh toch, veur de jètste kjèr sjtônge de Knöppele in ein proffesioneele studio, mit echte muzikante en eine echte arrangeur. Dit resulteerde in de CD "Laot d'n tap mèr laupe" mit 10 nuuj nummers, allemaol gesjeeve door de Knöppele, en op meziek gezat door Jürgen Daemen.

patronaatsknoppele org logo

Op aandringen van arrangeur Freddy Mays woorte ein twjètal nummers ingezônde nao ‘t Limburgs Vastelaovesleedjes Konkoer (LVK). Op eine zôndigmiddig in Januari 2002 zaote de knöppele mit aanhang vol sjpanning in ‘t appartement van Jan aan de radio gekloestert. Weurt ein van hun leedjes gekaoze in de hauf finale van ‘t Limburgs Vastelaovesleedjes Konkoer? D’r zouwe 60 hauf finaliste bekènd gemaak waere, mèh nao 2 oer aan de radio waore de Knöppele nog ummer neet genumd. De lètste 10 leedjes woorte aangekondigd mèh biej leedje nummer 58 waore ze nog ummer neet genumd. Sjûs toen Pierre zag “ ich vraog mich aaf watste môs doon om hiej biej te kènne zeen” woort es 59ste leedje “Auwt” van de Patronaatsknöppele oet Aelse gedrèjd. Aelse haet veur de jètste kjèr ein leedje in de hauf finale!

Nao ein paar waeke in sjpanning woort noe, biej Jos in de kamer, geloesterd nao de bekèndmaking van de finaliste van ‘t Limburgs Vastelaovesleedjes Konkoer 2002. En jewaal, es derde leedje klink weer “Auwt” oet de boxe, en tegeliekertied sjprunk ein kameraploog van L1 veur de vinster, mit in hun midde Sjra Puts dae de totaal vebouwereerde Patronaatsknöppele live veur L1 radio en tillevisie ein intervieuw aafnump. De Knöppele doon veur de jètste kjèr mit en kômme direk in de finale, ongeluifelik.

Op 24 Januari 2002 is ‘t zwawiet, de finale in de veilinghalle van Grubbevorst. Aelse mit drie vol bösse mit supporters debiej. De Knöppele opvallend röstig, “veer höbbe niks te verleeze, dat veer hiej maoge sjtaon is al geweldig”. Mèh es ze de buun opgaon en ze zeen dae massa luuj (4000!!) veur zich môtte ze toch waal effe sjlikke. ‘T optrèje geit hartsjtikke good, en nao ein zenuwsjlopende puntetèlling, kômme de Knöppele op ein gedeilde 11e plaats terrech. Omdat die 11e plaats, same mit plaats 1,2 en 3 rech geuf op ein plaats in de zoepkoel op vastelaoveszaoterdig, is ‘t nog effe sjpannend. Mèh nao tèlling van ‘t aantal ingesjtuurde formuliere, geit dat helaas neet door.

In 2003 kôme de Patronaatsknöppele, taege alle verwachtige in, helaas neet door de veurrunjes heen. De teleursjtèlling is bès grwat, ômdat eederein de nuuj single en veural 't nummer Hoebair 'ne regelrechte klapper vunk. D'r waere giganties väöl sjtöks verkoch, de plaat sjteit waekelank in versjillende Limburgse hitperades en de optraejes sjtruime bènne!

Druk op enter om te zoeken